اینچوکی گال پ شهید بانوک کریمه بلوچ

شھید شیرزال بانُک کریما مھراب ءِ نام ءَ

بانُک کریما بانڑی دروَر

جی منی راج ءِ تنگویں رھبر

شاہ ءِ شھیدانی دْروشم ءُ ھمسر

کمبر ءِ جُھدانی گُلیں گَوھَر

دزگْوھار لیلا ھالد ءِ ماھیں

ھالد ءِ وابانی توئے تابِیر

بزّگیں راج ءِ مَنّویں منگِیر

سر وتی بکشات ھاتر ءَ راج ءِ

پہ اِزّت ءُ ننگ ءَ تو گْوھارانی

گار ءُ بیگْواھیں کندیل بْراتانی

سَردَریں مات ءُ دِرتہ پُچّانی

جی بلوچی تئی ازت ءُ لَجّ ءَ

آجوئی جھد ءِ شیرزال پُلّیں

راج دوست راج ءِ مئے میارجلّیں

شِیر ھلار کُرتگ مادر ءِ مَلّیں

نوش اِتگ مرگ ءِ شربتے تھلیں

تُمپ پُرسیگ ءُ مند ارسیگ اِنت

لس بلوچستان رَنج ءُ دردیگ اِنت

نوک کُتگ راجدپتر بلوچانی

بانڑی زندگ کُت ستاھانی

دوست پُرسیگ ءُ دژمن شادان اَنت

تو نمیران ئے دپتر ءَ راج ءِ

تو مئے پِگرانی گْرُھبریں تاج ئے

”مَرگ پہ انسان ءَ یکبرے ھَکّ اِنت

زند پہ ازت بات مرگ ھم ازت بات

جنّت ءِ باگے تئی نسیب ءَ بات

مجلس ءُ دیوان گوں شھیداں بات

ھون شھیدانی ازت اَنت راج ءِ

ھون آجوئی پُلّیں مستاگ اِنت

ھون گْوھارانی پَنّ ءُ مُزواک اَنت

ھون سالونک ءِ نِبرہ ءُ پرداچ

ھون گُل ءِ دست ءِ ھنّی اِنت سُھریں

ھون بْراتانی پاگ ءِ چوٹیل اِنت

ھون پِسّانی شان ءُ مندیل اِنت

ھون ماتانی لیلو پاسانی

ھون تئی راج ءِ تنگویں رھشون

ھون تئئ راج ءِ دپتر ءِ بْراہ اِنت

ھون آجوئی ءِ مادنیں راہ اِنت

ھون بامسار ءِ دْروشم ءُ گْواہ اِنت

الّم ءَ بانُک ھون نہ بیت تاوان

کَم نِھاد چون بیت لُو لُو ءُ مَرجان

ھون رودین اِیت گْواڑگ ءُ پُلّاں

ھون تئی جھد ءِ مانزمان بیت

کودکیں آشوب کَیت جَوان بیت

کودکیں آشوب کَیت جَوان بیت